01.11.2024

Arctic Importip kræftimik akiuiniarneq tapersersorpaa

Stop krften 2024

Ukioq manna aammaarluni Arctic Import Neriuffiit Kattuffiata ukiumoortumik nuna tamakkerlugu katersuiniarneranut gultimik aningaasaliisuuvoq, tamanna pissaaq ulloq 1. november 2024 KNR-TV-kullu toqqaannartumik takutinneqassalluni. Kalaallit Nunaanni kræftimik eqqugaanikut pitsaanerusunik atugaqalernissaannut suliniuteqartunut tapersiinerput, suliniutitta pingaarutilinnik tapersersuijuarnitta ilagivaat.

Neriuffiit Kattuffiat ukiuni kingullerni Nuummi Kræftimik nappaatillit Illuliorniarlutik aningaasanik katersinikuupput, iluarsartuullugu pilersaarusiaq naatsorsuutigineqarpoq 30. juni 2026 nallertinnagu naammassineqassasoq. Kræftimik Nappaatillit Illuat kræftimik napparsimasunut ilaqutaannullu siunnersuisarfiussaaq, ilisimatitsisarfiulluni, tapersersuisarfiullunilu. Ilaatigut ilinniarsimasunik oqaloqatiginnittarfeqassaaq, paasititsiniaalluni ataatsimiisitsisoqartassaaq kræftimillu napparsimasunut taakkualu ilaqutaannut SANA-mi suliaritinnerup nalaani angerlarsimaffippalaartumik avatangiiseqartumik inissiaqassaaq, taamaasilluni napparsimmavimmi avatangiisit qimalaarnissaanut periarfissiisumik.

Arctic Importimi suliniutit taama ittut tapersersornissaat inuiaqatigiinni akisussaaffimmik pingaarutilittut isigivarput. Kræfti nappaataavoq inuppassuarnut toqqaannartumik toqqaannanngitsumilluunniit sunniuteqartoq, eqqugaasullu pitsaanerusunik atugaqalernissamut periarfissaqarnissaannullu tapersersuinissatsinnut pingaartuusoraarput. Neriuffiit Kattuffiannut tapersersuinermi kræftimik pinaveersaartitsiniarneq pillugu paasissutissiisarnermi iluaquseeqataavugut aamma napparsimasunut taakkualu ilaqutaannut suliaritinnerata nalaanni tapersersuilluta.

Neriuffiit Kattuffiat Kalaallit Nunaanni suliarujussuat pillugu pimoorussinerallu pillugu qujaffigerusupparput. Suliaat kræftimik nappaatilinnut taakkualu ilaqutaannut immikkuullarissuseqarluarpoq, uagullu suliaanut gultimik tapersersuisinnaanerput tulluusimaarutigaarput.