Arctic Importip ukiumi naatsorsuuteqarfiusumi 2024-mi nunani avannarlerni iluanaarutigisani Kalaallit Nunaanni ineriartortitsinissamut aningaasaliissutigeqqippai

Arctic Importip ukiumi naatsorsuuteqarfiusumi 2024-mi nunani avannarlerni iluanaarutigisani Kalaallit Nunaanni ineriartortitsinissamut aningaasaliissutigeqqippai

Arctic Import A/S-ip ullumikkut 2024-mut ukiumut naatsorsuutit saqqummiuppai, tassanilu takuneqarsinnaavoq suliffeqarfik Nunani Avannarlerni ajunngitsumik ineriartorsimasoq, tamannalu aamma aningaasatigut angusani takuneqarsinnaavoq. Suliffeqarfik pingaarnertut Nuummi Danmarkimilu Aalborgimi inissisimavoq, suliffeqarfilli Savalimmiuni Islandimilu aamma ingerlataqarpoq. Siulersuisut aqutsisullu angusat iluarisimaartorujussuuaat, nuannaarutigalugulu Nunani Avannarlermi niuernermit sinneqartoorutaasut, suliffeqarfiup Kalaallit Nunaanni ineriartuinnarnissaanut aningaasaliissutaammata.

Nuummi inissisimaffik nutaaq
Maannakkut Nuummi inissisimaffissaq nutaaq sanaartorneqaleruttorpoq, naatsorsuutigineqarlunilu 2026-mut ikaarsaarnerup nalaani atorneqalissasoq. Sanaartortitsineq suliffeqarfiup isumatusaarluni iliuuseqaa, taamaaliornikkullu Kalaallit Nunaannut naleqqussarneruneq anguniarneqarluni. ”Nunani avannarlerni niuerpugut, tunngaviusumilli Kalaallit Nunaanni suliffeqarfiuvugut. Taamaattumik uagutsinnut pingaaruteqarpoq iluanaarutit Kalaallit Nunaannut aningaasaliissutiginissaat, taamaalilluta inuiaqatigiinni peqataaffigisatsinni ineriartortitsisinnaalluta,” taama nassuiaavoq Arctic Importimi pisortaaneq, Thomas Hjort, nangillunilu: ”Nunani avannarlerni ataatsimoorfiusumi ukiut 45-t sinnerlugit peqataasimavugut, ukiullu 45-t tulliuttut aamma peqataassamaarpugut. Inuiaqatigiinni niuerfigisatsinni peqataavugut, inuiaqatigiinnilu akisussaaffigisarput pimoorullutigu. Taamaattumik ukioq manna angusatta Kalaallit Nunaannut toqqaannartumik aningaasaliissutiginissaannut periarfissaqarsimanerput nuannaarutigeqaarput – aningaasaliissutit suliffeqarfiup atortussaanuinnaq attuumassuteqanngillat – inunnulli ataatsimoorfinnullu aamma attuumassuteqarput.”

Arctic Importip Nuummi inissisimaffiani nutaami peqqumaasiviit annertusineqassapput, amerlanernik nunaqavissunik suliffissaqartitsisoqassaaq, ilinniartunut suliffissat amerlissapput aammalu Nuup aammalu Europap Amerikallu avannarliup akornanni patajaannerusumik angallassisinnaaneq pilersinneqassalluni, taakkualu saniatigut suliffeqarfik Kalaallit Nunaanni takornariaqarnerup iluani ineriartornermut tapersersuinissaminut piareersimalluni.

Sinneqartoorutit 2023-mut sanilliunnerini annertuseriaateqartut
Suliffeqarfiup 2024-mut sinneqartoorutai 13,9 mio. kr.-iupput, 2023-mullu sanilliukkaanni tassani sinneqartoorut 12,2 mio. kr.-iuvoq, suliffeqarfiulli 31. decembari 2024-mi namminerisamik aningaasaatai 48 mio. kr.-iusimapput

Arctic Import 2024-mi Nunani avannarlerniinnini annertusarniarlugu suliniuteqarsimavoq, tassanilu Islandimi niueqateqarnini annertusarsimallugu. ”Angusatta kusanaqisut angunerannut peqqutaanerpaavoq Islandimi Kalaallit Nunaannilu niuernermi annertunerulersitsinerput, niuernermi attavigut annertusisimavagut sumiiffinnilu periarfissanik nutaanik pilersitsisimalluta. Ineriartorneq una piffissaq ungasinnerusoq isigalugu periusissiornermit aammalu suleqatigiinnik nukittuunik peqateqarnikkut angusaavoq, siunissamilu ineriartorteqqitassaraarput,” Thomas Hjort paasissutissiivoq.